Little Rubies...

ليتل روبيز .. المطعم موجود من زمان بالديره مقابل كوفي ريبابلك 

المطعم صارله مده قصيره فتح بالافنيوز صوب سوكو 

الي لاحظته ان المطعم ماعليه زحمه بالفرعين احس مهضوم حقه لان اكله زين 

 الي يروحوله هذول من الذواقه المحبين للمزج بين الاصناف  

وهذا المنيو 

اول شي المقبلات 

فرايز مشرووم 

عباره عن مشروم بالبقسماط مقلي ، المشروم حلو بس الصلصه الي حاطينها حيل بايخه ، ماصخه مافيها طعم 

ديب نوعين خرشوف وسبانخ 

اول ماتاكلونهم راح تحسون بطعم زيت الزيتون طاغي ، للامانه حلو وغريب مو مألوف 

شورت ريبز مع خس 
الشورت ريبز مو الكل يحبها لان معظمها شحم ، اول ماكليتها ماعجبتني لكن مع القرمه الثانيه تصير احلى ويا الخس 
الي يحبون هالنوع من اللحوم راح تعجبهم لان مطبوخه عدل 

المطعم الحلو فيه ان كل طبق فيه لمسه غريبه ..

سلطة المانجو والدجاج ، وايد يازلنا الكومبينيشن الي مسوينه بين المنجا والدياي و الجرجير 

الصلصه بلساميك .. اتوقع اهيا اضبط صلصه بس عيبهم اذا كثروها بالسلطه راح تصير ماالحه 

من اطباقنا الرئيسيه 

برونتو بيرقر 

اول مره اجرب بيرقر بخبزة البنيني ، اللحم حلو والمكونات جرجير و شيلي صوص و مايونيز 

الشيلي صوص معطيها طعم سويت ككل البيرقر عجبتني 

كاليفورنيا بيرقر 

البيرقر فاطمه طلبتها بدون طماط وفيها افوكادو .. طعم البيرقر ككل حلو والبطاط الي معاه حسيت فيه طعم ترافل اويل "زيت الكمأه" ماينيت عليه بس هم كليته 

البينك باستا 

اتوقع الحين محد ماقام يضبط البينك باستا .. الباستا نفسها حلوه والحلو انها مو وايد لينه

عصير الليمون بالنعناع 
مو ضابطينه عدل وايد نعناااع 

المطعم اطباقه وايد غريبه ومو مألوفه ، ينفع حق الناس الي يحبون يجربون اشياء يديده 
ومن الي لاحظته المطعم وايد مدخلين جانب الفاكهه بالاكل جنهم يدرون ان الشعب ماياكل فواكه وايد 

تجربه ممتعه و مميزه ، المطعم اكله زوين نروحله مره ثانيه ان شاء الله 

تقييمنا اهو .. 7 شطائر !

ساكت عجيب ..

من اسمه ساكت عجيب يعني اكل و راح تستمتع .. المطعم قديم موجود بخيطان ومن الي لاحظناه الشباب دايما يروحوله و يمدحونه واذا في بنات يروحون ياخذون تيك اواي .. عاد احنا قلنا لازم نكسر القاعده ونوصل تجربتنا لكم اخذنا الاهل و رحنا 

وتم استقبالنا بكل فرح 

اول شي قدمولنا 

الي يشتغلون كانوا وايد حبوبين معانا قدمولنا الماي وصحن الخضار و خيار وجزر ... المطعم ماينفع حق الي يوسوسون بنظافة الاكل يبيله قلب قوي 

ومن طلباتنا 

سمبوسك جين و خضار 

السمبوسه حاره مقرمشه وحلوه طبعا الجبن احلى بس في ناس يحبون الخضار 

الجباتي لذيذ وماحسيت فيه دهن وايد .. حلاته تاكلونه حار و الحلو ان المطعم اييبونلكم جبن كرافت يعني يخلونكم تمزجون بالاكل عدل 

وهذي كل طلباتنا 

بيض وطماط و بصل حلوو اول مره اكله من مطعم هندي و يعجبني 

القيمه : لحم مفروم مع بازاليا ، وايد حلوه عندهم 

طبعا اهم شي الجاي حليب على طريقتهم  اللذيذه 

المطعم هندي يعني الي يحب هالنوع من الاكل انصح يروحله والي مايحب هم لازم يكسر القاعده و يجرب لان طايفه نص عمره 

السؤال هل ممكن نعيد هالتجربه ؟ الجواب اي ليش لا المهم اكل حلو ، وترا يبيله مزاج 

اخر شي تقييمنا للمطعم اهو 9 جباتي !

Chocolate Bar ..

كل الي يحبون الكاكاو وحق الي طلبوا نتكلم عن جوكلت بار ... عندهم احلى كاكاو ويرضي كل الاذواق 

يوفرون ريوق و ساندويش و باستا و حلو بكل انواعه 

موجود بالمارينا كرسنت ، البدع ، الافنيوز ، واخر فرع فتح بالحمرا تاور 

تريقنا عنده كذا مره ريوقهم زوين بس عيبهم ان الوافل يقدمونه بفترة الريوق بس .. ليش الوافل مو من السويت ؟ الظاهر هذه سياستهم ماعلينا 

نبدي بالحلو 

brownie ala mode

اقدر اقول احلى براوني كليتها الكيكه عجيبه مع الكاكاو الحار و الايس كريم

Goowy cake 

وايد ثقيله اذا طلبتوها لازم تطلبون ماي ! بس تستاهل لانها حلوه والايس كريم ممكن تقولولهم يحطونه بروح بصحن عشان تصير احلى وتستمتعون فيها 

Crunchy crumbly ice cream pie 

من اسمها مبين انها عجيبه مقرمشه ومن داخل ناعمه ، ممزوجه بحراره و بروده هذا من اطباق فاطمه المفضله ، حبيته منها 

 اخر شي اعتقد اهو الي كان السر ورا شهرة جوكلت بار 

الفوندو ... تختارون ثلاث انواع من الكاكاو و اربع ديبس "حق التغمس" احنا اخترنا الوايت و الدارك و الميلك جوكلت 

كلهم حلوين ، لازم مع الديبس : فراوله ، براوني بايتس ، كوكيز ، موز 

طبعا مانستغني عن الفرايز "البطاط" ، بطاطهم عجيب لازم تسوون مكس بين الحلو و المالح

وبالصوره طالبين ساندويش .. من الي ذقناهم الثري شيز و تيركي و حلوم .. حلوين وخفاف  

واخر شي البينك باستا 

حلوه بس في احلى منها ، تستحق التجربه

اذا رحتوا جربوا المكسيكان هوت جوكلت و الدوبل شوت جوكلت ، المكسيكان عجييب فيه دارسين لازم تجربونه  

جوكليت بار اعطيه على كل شي 9 شطيرات!

Laduree

اتوقع عرفتو اني احب المطاعم الفرنسيه او اي لمحه فرنسيه فيها

لادوريه فرنسي بحت يايكم من فرنسا عبر شركة لازورد

المطعم مكانه في 360 و في محلين واحد فيه قعدات و الثاني تيك اوي و للاوردات و الاستفسارات .. طبعا التيك اوي انواع السويتس

نبدي بالريوق

عندهم اوملت مره جربته اذكر كان زوين .. بس الصراحه اذا بتتريقون لازم الفرنش توست !
مشهورين فيها و صج لذيذه و ماتحتاجون تحطون فوقها شي لانها اهيا فيها حلاة كافيه .. كانت بالنسبه لي ثقيله بس لذيييذه

وعندعم سندويتشات ميني على جبن نتفه يونسون .


الغدا او العشا

الطبق الي ما يتطوف
chicken vol oi vent

بف باستري اييبونها و يصبون فوقها صلصه فيها مشروم و دياي لين تذوب البف باستري ..لذييذه
و ايد ثقيله لكن تسوى

جربت الميني برقرز هم كانت حلوة و  جربنا الميني بيرقر الدياي حلو حبيناه والبطاط العريض يونس

و ايضا من تجاربي كان ستيك و رافيولي باستا ...

هالاصناف الي ذكرتها انصح فيها و كانت لذيذه
و ختامها لازم مكروون ..بدون مناقشه احلى مكرون بالكويت و احب نكهة القهوة

الي يروح المطعم يجرب الي حطيتهم هذول احلى شي ..السويتس انا احب المكرون لكن علياء ماتحبه ، في ناس يحبون كيكة اصفهان ,احنا مو من معجبينها لكن البعض يحبها ..عموما الحلويات جربوها على حسب الذوق


جم اعطيه ؟ عالمكرون 10 شطيرات !
المطعم ككل يبيله مزاج مو كل مره ينراحله .. اعطيه 9 شطيرات لاطباقي
  

Shake shack

مطعم شيك شاك.. لمحبي البرقر

موجود بالافنيوز داخل و بقراند و ايضا بالفنار

  

احب المطاعم الي فيها سلف سيرفس .. اول ما تطلب يعطونك جهاز يرن لي خلص طلبك 

تاخذ الصينيه تحطلك كاتشاب اذا تبي , تصبلك بيبسي تقعد و تاكل

المطعم فيه هوت دوق ساندويتشز بالاضافه الى البرقرز و ميلك شيكهم يونس و الحين عنهم انواع برد يتفننون فيه .. الميلك شيك عباره عن سكوب برد نصه ذايب يعني ثقيل و و تخيلو طعمه , اصلي

البرقر قبل كان ثقيل و وايد دهن, رحتله مره ثانيه حسيته تحسن .. و قل الدهن و البطاط مالهم شكله يذكرني في بطاط اول ...البرقر ممكن تكون عالبعض ثقيله لكن لذيذه

اعطي المطعم 8 شطيرات , اقدر اعتبره من المطاعم الي يقدم برقر يشبع مزاجك و في مطاعم احلى انشالله بالبوستات اليايه  

كيكة بترا

شركة بترا منزلين كيكة الفروزن يوقرت

الكيكة منها نوعين ,اوريجينال و منجا

ماجربتها لكن احسها بتكون اخف و اقل سعرات حرارية من الكيك العادي

الي يحب الفروزن يوقرت اتوقع بتعجبه

انا احب كيكية البرد مالتهم .. المهم سعر الكيكة اليديده ب  9.5

شرب القهوة يؤدي الى الوفاة ؟

يقولكم دراسة يديدة تقول ان شرب اكثر من % اكواب قعوة باليوم تؤدي الى الوفاة بنسبه 50% للي اعمارهم اقل من 55 سنة

و باحث اخر يقول انه ما اكتشف اي ترابط بين استهلاك القهوة و اسباب الوفاة !

منو نصدق؟؟؟

 انا اقول ان كوب قهوة باليوم كفيل بتعديل المزاج و صحي تقريبا