Ben's cookies

بنز كوكيز 

تلقونه بالافنيوز قريب من كيدزانيا 

حق الي يحب الكوكيز او الحلو عموما ننصحه يجربه ، عندهم الكوكي العادي وعندهم اضافات وانواع ثانيه 

عندهم ايس كريم (ماجربناه) ،لكن فاطمه ذاقته و قالت حلو زين  وهذا اهو 

الكوكيز

طلبنا نوعين كوكيز 

وحده بميلك جوكلت و ثانيه بالدارك جوكلت ، اهما الاثنين حلوين بس المشكله وايد دهن و ثقيله ، ماقدرنا نكملها 

عندهم كوكيز بزيدة الفول السوداني شوقني بس ماجربناه 

الي يجرب انواع ثانيه يقولنا 

يستاهل بس على الكوكيز 8 شطائر

Tim Horton's

تيم هورتنز كافيه مشهور بكندا .. من فتره قصيره فتح فرعه الاول بالكويت .. مكانه بالافنيوز موجود فوق دين اند ديلوكا جهة المطاعم

الي لفت نظرنا ان الكافيه اسعاره وايد رخيصه مقارنه بالاماكن الثانيه الي متعودين عليها

كتجربه اولى لنا سألنا الي يشتغلون عن احلى قهوه عندهم 

وكان الاختيار على french vanilla 

القهوه وايد سويت ماتحسون بطعم القهوه نفسها وايد بس حبيتها ، ماتنفع حق الي مايحبون السويت 

 وهذي الدبل جوكلت دونت حلوه حبيناها 

 البيقل من manager choice 
حلوه وايد حبيناها سبايسي وداخلها لايت كريم 

واخر شي فاتورتنا 

 جربنا البارد عندهم الكابتشينو المثلج هم نفس الشي كان وايد سويت مع ان ماكان مع اي نكهه 

الكافيه بنعطيه 6 شطيرات بس ان شاء الله راح نروح ونجرب اللاتيه عندهم ، ونوافيكم بالتطورات  

Dean&Deluca

دين اند ديلوكا شبيه مركز السلطان ... اهو شوبينق سنتر و بنفس الوقت مطعم 

اشياؤهم حلوه من اللحوم و الزيتون والفواكه ، حتى اييبون ككاو وصلصات مو موجوده بالجمعيات ... مع فرق السعر طبعاً 

ناخذ مقتطفات 

مكانه بالافنيوز اتوقع الكل يعرف وين بالضيط ، يتله فتره صكوه حق التوسعه ، ماشاءالله المطعم تقريبا طول اليوم زحمه بكل الاوقات ، مرات تحصلون اماكن بس مايكون فاضي 

جربنا عندهم الغدا و العشا اكلهم لاباس فيه ، احلى الاطباق هي الشاورما، وفي من المشويات الي قريبه من الاكل اللبناني ، احلى شي ان المنيو تقريباً موفر كل الاكلات 

اكثر شي نحب الريوق عندهم لان يرضي كل الاطراف بالذات لي صار معاكم احد لازم يتريق فطاير وسوالف اجبان 

من اطباقنا للريوق 

 البان كيك عندهم غير .. خفيف و فيه فواكه ، حلو ماحسيت فيه شي زود ، بس للامانه الشكل يفتح النفس وماينفع حق الي مايحبون البلو و البلاك والراز بيري "البيريز عموماً"

الاومليت كان من اختياري ... مع مشروم و جبن و هيليون وصوصج بالتوابل العربيه ، عجبني الصوصج تتبيلته حلوه  

اذا رحنا و ماطلبنا الحلوم المشوي مانحس
 بريوقهم ، احلى شي عندهم الحلومه مشويه بضمير على توسته محمشه بصلصه البيستو ، انصحكم فيها  

 الشي الثاني الحلو الفطاير ، اليوم طلبنا شي غير كان جبن مع بصل وفلفل اخضر و طماط ماعجبني وايد ، احلى شي عندهم فطاير الجبن العادي و السبانخ 

لان الاكل واااااايد دسم و يعطش لاازم تختمونها بماي 

وهذه الهوت موكا احبها ، يضبطونها وباجي انواع القهوه عندهم حلوين 

بالريوق جربنا بيتزا مع بيض ، تلقونها بالمنيو باسم بيتزا مخبوزه او شي جذي ، المهم حلوه البيض فيها مخبوز يعني بيض عيون ، الي مايحبه لايجازف ، والعكس حق الي يحب بيض العيون 

المطعم حلو وعيبه الوحيد ان ثقيل 

يستاهل 7 شطيرات !  

PAUL

PAUL من المطاعم الفرنسيه بالكويت 

له افرع عديده بالمارينا مول و بالافنيوز و الكوت

اهو مطعم و بنفس الوقت مخبز

المطعم يختلف عن مطاعم الشايع .. الموظفين حبوبين نفسيتهم حلوه و الحلو في سياسته ان  عندهم بريك ومن حقهم يختارون اي شي يبونه من الاكل ، اي نعم سألناهم !  

ومن كثر ماحبونا قدمولنا حلو كضيافه منهم  

المطعم يوفرلكم الريوق والغدا  + عشا و الحلو والقهوه

اول شي الريوق

الطبق الاول اومليت الخضار و هوت جوكلت 

الثاني كعكة الزبيب " متوفره طول اليوم ، بس هذا ريوق الراقين " و كافيه لاتيه 

ريوقهم ككل حلو ولذيذ 

الغدا+العشا 

سلطاتهم غريبه شوي مو من الي متعودين عليهم جربت جم وحده كانوا زوينين 

و في سلظة بيتنا يحبونها فيها تفاح يمدحونها

الشوربه 

الاولى مشروم وايد حلوه احبهاااا

الثانيه كانت عدس "شوربة اليوم" حلوه ومن شوربات الي تخص يوم معين البروكلي هم حلوه 

طبعا اول ماتقعدون يقدمولكم خبز وزبده وزيتون

 من الطلبات الي جربناها الاوبن و الكلوزد ساندويش ، في اشياء غريبه مثل تيركي مع البري جيز وكراميلايزد اونيون طعمها حلو وغريب و هم من الي جربناه الاوبن ساندويش كانت دياي مشوي مع مشروم وفلفل اخضر و احمر و سويس جيز وايد حلوه 

جربنا الستيك عندهم ماكان حلو وايد .. زين 

البيرقر حلو 

وجربنا الدياي بالكريمه عندهم وايد دسمه ما انصح فيها 

واحلى طبق حق الي يحبون الاكل البحري 

سالمون مشوي مع خضار و بطاط مهروس 

اول مره اكل سالمون بمطعم و يعجبني ، حاطين صلصة ليمون كريمي حلوه بس احسها ثقيله ، الطبق وايد صحي بس بدون الصلصه

 ومن الاطباق الحلوه الي جربناها صدر دياي مشوي ايي معاه عيش و اسباراقوس مشوي ملفوف ببيكون واختياركم من صلصة الفطر او الفلفل الاسود 

الحين اهم شي الحلو 

الحلو عندهم صج حلو ينفع حق عشاق الفراوله 

الاولى اكلير مع فراوله وايد حلوه انصحكم فيها 

عندهم مكرون انا ماحبه وايد لكن فاطمه تعشقه ورايها كان ان المكرون مالهم زوين بس مو بمستوى لادوريه 

الشيزكيك عندهم حلوه الجبن كريمي و البسكوت لذيذ

اخر وحده اهي العجيبه تارت الفراوله انصحكم فيها 

عندهم جوكلت فوندو ، كيكة ككاو داخلها ككاو حار مع ايس كريم ، مرات يضبطونها و مرات لا ، بس ككل زينه

القهوه عندهم  حلوه من الي جربناهم اللاتيه و الكابتشينو 

الاسامي بالمنيو مكتوبه بالفرنسي هذا الشي المليق لان لي يينا نطلب لازم تفكر شلون تنطق الكلمه ، المهم يمدحون التأشير 

المطعم يستاهل 9 شطيرات! 

De brand .. Chocolate

سوق الذهب اليديد .. فيه محل يبيع كاكاو .. مكانه شرح والديكور يفتح النفس و الحلو ان المكان هادي و فاضي ماعليه زحمه  

المحل ذكرني ب godiva

بس غير لانه فيه قعدات و اعتقد الحين يقدمون اكل 

جربت القهوة "كابتشينو" كانت حلوه زينه 

الاهم اهوا الكاكاو 

اول ما تدشون تلقون سطرة الكاكاو 

 من المميز فيهم الكاكاو الي على شكل بيض كل بيضه لها نكهه غير عن الثانيه ، شكل و طعم 

وعندهم  قالب من كاكاو و داخله قطع كاكاو صغار الشكل وايد مميز و الفكره حلوه ينفع اذا عندكم مناسبه وودكم تتميزون الحل عندهم و الحياة تحلى بالكاكاو 

طبعا احنا ماخليناهم غطينه كل الاسئله الي راح تخطر في بالكم 
القالب يسلمونكم ياه بارد لازم تطلبونه قبل اربع ساعات  او اذا كان متوفر يسلمونه لكم ، سعره مناسب و تتراوح الاسعار على حسب نوع قطع الكاكاو الي انتوا لكم الخيار باختيارها ، واخر شي القالب يتم بارد معاكم لمدة ساعتين 

الكاكاو لذيذ و لما تدشون المحل ودكم تجربون كل شي عندهم من كثر ما اشياؤهم تجذب و مميزه 

الصدمه كان هذا ! 

\

 شكلهم غريب و يخرع اذا دققتوا عدل ! طعمهم كلش مو حلو كانت تجربة فضول ان شاء الله ماراح تنعاد

عندهم كاكاو بار الي يصير نفس كاكاو الجمعيه بالشكل مو بالطعم لان هذا اكيد احلى ماجربناهم لكن اعتقد انهم حلوين 

واهم شي انهم يعترفون بالمناسبات 

اسعارهم وايد معقوله وزينه مو غالي ، متوسط الاسعار 

الكاكاو لذيذ .. والنكهات وايد ، تقدر تاخذ اربع قطع و اكثر 

خذينا قوطين فيه اربع قطع و بار كاكاو 

وهذا حسابنا

جربوه ومتعوا حواسكم بالكاكاو .. عليكم بالعافيه مقدما 

تقييمنا له 8 شطيراات!