ليلى من لبنان ..

ليلى حالياً نقدر نقول ان من احلى المطاعم اللبنانيه من ناحية جودة الاكل طبعاً ، لما ناكل عنده تحس صج الطباخ لبناني مو هندي ولا فلبيني ، بالمعنى الاصح ضابط الطبخه 

احلى شي المقبلات اللبنانيه 

من طلباتنا 

بطاطا بالكزبره او يسمونها بطاطا حاره ، متبله بثوم وبهارات حاره الي يحب الفلفل والبهار انصحه فيها 

اول مره اجربه صوصج على طريقة ليلى ، حلو حاطينه بدس الرمان معطيه طعم ناطع ، اي نعم عجبني بس ماراح اطلبه وايد 

و من المقبلات الي لازم نطلبها ... المحمره ، حمص بالصنوبر و فتة باذنجان 

طلباتنا الرئيسيه 

اذا رحتوا لازم تسالونهم عن طبق اليوم 

جربنا عندهم المحاشي كانوا لذيذييين 

من الاطباق الي دايماً نطلبها ، مشويات ليلى .. طبق من سيخ كباب و شيش طاووق و تكا وريش 

الشي الحلو ان لحمهم ترف ماتغصون فيه بالذات بالتكا لان في وايد مطاعم مايضبطونها 

لازم العرايس 

اخر شي جربنا طبق توا يضيفونه بالمنيو 

كباب بالكرز 

من قبل جربناه بمطعم المياس ... بس ليلى وايد احلى حسيتهم ضابطينه اكثر ! الكباب منقوع بالصلصه ماكان ناشف و صلصة الكرز نفسها مغيره الطعم ... الطبق حلو ينفع حق الي يحبون التغيير وفي ناس مايتقبلون الطعم 

المطعم ككل حلو يستاهل 9 شطائر!

Dean&Deluca

دين اند ديلوكا شبيه مركز السلطان ... اهو شوبينق سنتر و بنفس الوقت مطعم 

اشياؤهم حلوه من اللحوم و الزيتون والفواكه ، حتى اييبون ككاو وصلصات مو موجوده بالجمعيات ... مع فرق السعر طبعاً 

ناخذ مقتطفات 

مكانه بالافنيوز اتوقع الكل يعرف وين بالضيط ، يتله فتره صكوه حق التوسعه ، ماشاءالله المطعم تقريبا طول اليوم زحمه بكل الاوقات ، مرات تحصلون اماكن بس مايكون فاضي 

جربنا عندهم الغدا و العشا اكلهم لاباس فيه ، احلى الاطباق هي الشاورما، وفي من المشويات الي قريبه من الاكل اللبناني ، احلى شي ان المنيو تقريباً موفر كل الاكلات 

اكثر شي نحب الريوق عندهم لان يرضي كل الاطراف بالذات لي صار معاكم احد لازم يتريق فطاير وسوالف اجبان 

من اطباقنا للريوق 

 البان كيك عندهم غير .. خفيف و فيه فواكه ، حلو ماحسيت فيه شي زود ، بس للامانه الشكل يفتح النفس وماينفع حق الي مايحبون البلو و البلاك والراز بيري "البيريز عموماً"

الاومليت كان من اختياري ... مع مشروم و جبن و هيليون وصوصج بالتوابل العربيه ، عجبني الصوصج تتبيلته حلوه  

اذا رحنا و ماطلبنا الحلوم المشوي مانحس
 بريوقهم ، احلى شي عندهم الحلومه مشويه بضمير على توسته محمشه بصلصه البيستو ، انصحكم فيها  

 الشي الثاني الحلو الفطاير ، اليوم طلبنا شي غير كان جبن مع بصل وفلفل اخضر و طماط ماعجبني وايد ، احلى شي عندهم فطاير الجبن العادي و السبانخ 

لان الاكل واااااايد دسم و يعطش لاازم تختمونها بماي 

وهذه الهوت موكا احبها ، يضبطونها وباجي انواع القهوه عندهم حلوين 

بالريوق جربنا بيتزا مع بيض ، تلقونها بالمنيو باسم بيتزا مخبوزه او شي جذي ، المهم حلوه البيض فيها مخبوز يعني بيض عيون ، الي مايحبه لايجازف ، والعكس حق الي يحب بيض العيون 

المطعم حلو وعيبه الوحيد ان ثقيل 

يستاهل 7 شطيرات !  

Full house burger

مطعم يتميز بالبرقر <بادارة كويتيه .. من ايد الشف احمد الناصر

المطعم مكانه بالشعب البحري بجانب نادي فلكس

و يوصل لكن الاكل وصل شوي بارد..حلاته تروحون تاكلونه حار

نبدي طلباتنا

  The famous onoin rings

حلوة و الصلصه الي معاها راكبه و حلوة , انا حسيت ان وايد دهن بس الي معاي قالو لا و انها لذيذه  

 Smoke house burger

البرقر حلوة و اللحم الي فيها نفسه حلو

و الي يازلي فيها الهالابينو مخلي البرقر احلى زياده

Mushroom burger

طلب امي و قالت واايد لذيذة

Low carb burger

عندهم برقر لو كارب و تختار تحط الي فيها و اذا دياي ولا لحم

طلب اختي و قالت لذيذة

Fries

عجبني

المطعم حلو و اكله نظيف و لذيذ بنفس الوقت و نوع اللحم و طعمه لذيذ .. لكني احس اني ماكله احلى

المطعم ما يعيبه شي و يمكن البعض يقول ثقيل لان البيرقر فيها صلصلات لكن بالنسبه لي هذا الي محليها

اعطيه 8 شطيرات 



Cutting edge

كاتينق ايدج صالون اذا فكرت اني اقص شعري او اصبغه اروحله اهوا

الفرق عن باجي الصالونات ان الستاف معظمهم بريطانيين و بروفيشنالز .. وايد اثق فيهم

الصالون موجود في بلازا

السالمي , تدشون المصافط و تكملون سيده تلقونه يم صالون ثاني نسيت اسمه بس لافتته خضرا

تدشون البنايه تلقونه بالدور الاول ..

اتمنى تكون تجربتكم حلوة

Dip n dip

الكاكاو معظمنا نعشقه ومن لا يعشقه عالاقل ياكل قرمه منه

المهم نرجع للكاكاو ديب ان ديب مكانه استراتيجي حق المثقفين .. تشتري كتاب من ذات السلاسل و تطلع تحلي

براوني كريب

بالنسبه لي الطبق الشهير عندهم و تقشعر له الابدان بس من منظر الكاكااااو

تاكله و لما تخلصه تييب القفشه و تاكل بقايا الكاكاو لذيذ

فراولة مغمسه بكاكاو .علياء تموت عالفراولة و عجبها

براوني .. حليوه

و جربت طبق اسمه بان بردو.. مافيه كاكاو بس حلو

انصح الي يروحون لازم البراوني كريب , و الوافل طريقة تقديمه حلوة يصبولك الكاكاو عليه من قرشه او انت تصبه

وعندهم طبق اسمه فيوتشيني كريب الشكل شكل باستا و فوقها كاكاو طبعا

و المشهور وافل ستيك

نوعيه الكاكاو حلوة و لذيذة

اعطيه على الوافل و البراوني كريب 8 او 7 شطيرات

حلو جربوهم





Regency

ساعات الواحد يبي يروح مكان هادي بعيد عن لوية المجمعات ..سواء طلعه سوالف و وناسه او طلعه لمناقشه اشغالك

لقينا المكان المناسب

الريجينسي كافيه اللوبي مالهم جدا هادي مع ان مو خالي و في ناس لكن مو مزعجين نهائيا

هذي الدخله

منظر الورد و الاضاءة الخفيفه بروحها بس تريح الاعصاب

اختي طلبت عصير مع برد اعتقد,عجبها حلو

طلبنا بقلاوة من الشيف يابولنا شي ماله علاقه بالبقلاوة , بس الشيف و كيفه عاد ههههه

و كابتشينو و لاتيه اهوا الكوب الطويل ..حلوين

الطاوله الورد الي عليها بروحه شرح

ترفع راسك تشوف هالسقف ونسني مادري ليش







ختاما .. المكان هادي و حلو و طبق البقلاوه حلو عادي , عندهم ساندويشات اتوقع هم حلوة ,الريجينسي اكلهم معروف ان حلو

و تقعد على انغام وحدة تعزف عالبيانو .. المكان فعلا مريح و ينفع تقعد مع لابتوبك تشتغل او حتى تدرس .. و الستاف فرندلي و مبتسمين طول الوقت

الي يبي تغير عن المجمعات  .. انصحه يروحله  

ihop

المطعم جدا مشهور بأمريكا و معروف انه يقدم ريوق 24 ساعه .. معنى المطعم

international house of pancake

فمعظم الريوق ايي معاه صحن بانكيك .. يبونكم تاكلونه

لحد الحين كل روحاتنا له كانت ريوق .. و حلو

Colorado omlette

اوملت للمتوحشين .. فيها كل انواع اللحوم .. صوصج,بيكون.تيركي, و اعتقد ستيك

و معاها صلصه انا عن نفسي احبها ,فوقها تباسكو و غوصو فيها

اعتقد اسمه سامبلر :\

تلقون صورته ,و المكونات جدامكم و البيضه تطلبون الصفار على حسب ما تبون

مثل ما قلت الاومليت معاها بان كيك ..و في خمس انواع

sauces

تحطونه فوقها تلقونها بالطاولة

spinach omlette

الفرق عن الباجي ان معاه صحن فواكة مو بان كيك بس اختي تقول ثقيله

Club sandwich

 ما ذقتها لكن الي معاي كلوها و قالو انها لذيذة و ما فيها دهن وايد

و البطاط فيه رشة بابريكا

Strawberry Waffle

هذي تيي مع طبق بيض العيون .. صحن فاكهه و وافلز فراولة

Regular waffle

الكل عجبته لكن انا ماحب هالنوعيه وايد افضل الوافلز العاديه ,محشيه فيها كريمه اعتقد و فيها طعم دارسين .. ما حبيتها وايد لاني ما حسيتها وافلز جنها

cinnamon roll

بس طعمها اتوقع يعجب الكل

المطعم ريوقه حلو .. دامه امريكي فأكيد بكون ثقيل الاومليت حجمها كبير يعني احس فيه فوق الثلاث بيضات

جربت مرة اومليت الستيك .. هم حلوة

 الريوق متنوع في غير البيض انواع الكريب المحشي , و انواع بان كيك ..

و في قسم حق الريوق الهيلثي

الاميركان كوفي عندهم حلوة .. و الكابتشينو كبير و العصير زين

اتوقع الغدا يكون بنفس مستوى الريوق , حلو

اعطيه ٨ شطيرات