Nino

منو ما يعرف مطعم نينو يعتبر من المطاعم الايطاليه بالكويت ... موجود بالبحر و الحين بالافنيوز اكيد

الصراحة المطعم تقريبا كل اكله لذيذ

و الحين عندهم تجديد بالمنيو و اضافو اطباق يديه منها بلاتر فيه ماكي رول .. جدا حلو

طلبنا اليوم عينه بسيطه من اكلهم ما يمنع نشاركم فيها

لازم خبز و احط فوقه زبده و جبن البارميزان

 

BRUSSELS SPROUTS 

نوع من الخضار يشبه الخس لذيذ و فيه معاه قطع بيكون صغيره و صلصه خفيفه

 

CHICKEN & AVOCADO SLIDERS

 

انا عندي روتيني سلايدرز "اللحم" احلى.. لكن هذي لذيذه و تحس بالدياي طعم الاعشاب و البهارات و الافوكادو معطيها لذة

 

FILLETO PORCINI

ستيك مع مشروووم واااايد و بطاط على بارميزان لذيذه وااايد و نينو معروف الستيك الول دون عندهم ترف و يذوب بالحلج

 

LAMB CHOPS

 يعني ريش .. ذقته و حلو فعلا .. و معاه هذي مو صلصه تقريبا جنها حمص و هذي اعتقد مثل عجينه و فيها صلصه ذكرتني بالقبوط

اللحم طعمه حلو

 

 

 

 

 

بالاخير نينو عنده اطباااق اكثر لذه مثل الباستا والبيزا و في مرات يايه اكيد نروح و ناكل

التقييم طبعا لذيذ اعطيه 9 فقط لان من المنيو اليديد فيه جم طبق نقدر نقول مليق

شهريار..

احلى شي المطاعم الايرانيه 

اذا ماحصلتوا مطعم ايراني من طباخ الايرانيه نفسهم وودكم بمكان حلو و اكله حلو مالكم الا شهريار .. 

مكانه بقراند الافنيوز اهو احد سلسلة مطاعم الشيراتون يعني تلقونه هناك بعد .. 

استقبالهم وايد حلو ومن ناحية النظافه وايد نظاف ، الطاولات و كل شي نظيف 

استقبالهم مثل المطاعم الايرانيه ، لازم جبن و خضار 

طلبنا منهم شورية عدس 

وايد حلوه حاطين فيها زعفران ، انصح الي يحب العدس يجربها 

المقبلات كانت صنفين ، واحد من المقبلات البارده و الثاني حار 

برهاني باذنجان 

ميرزا قاسمي 

المقبلات لا باس فيها ، تصبيره حق الياي 

الاطباق الرئيسيه 

كباب بلغاري 

قطع الدياي و اللحم متبلين بالزعفران 

حلو الطبق حبيت اللحم اكثر من الدياي 

 اسطنبولي بولو 

العيش مع فاصوليا حلو حبيناه ، داخل العيش اللحم ، الطبق يشوق من برا وداخل 

شبزي مع عيش 

مايصير تروحون مطعم ايراني بدون ماتطلبونه حلو نفس باجي المطاعم بس كان يبيله ملح زياده

كورشت كارج 

عيش زعفران و مرق فيه مشروم 

مو حلو حتى الويترس قال لا تطلبونه ماراح يعجبكم ... والحمدالله ماكان احد اطباقنا الي اكلناها ، اذا رحتوا لا تطلبونه 

المطعم راقي بالخدمه و التقديم اعطيهم 10 على التعامل و الجو ، والاطباق اللي طلبناهم 7 شطيرات !  

Burger boutique

بالنسبه لنا احلى مطاعم برقر بالكويت اهيا سلسلة مطاعم المبدع دائما باسل السالم , اوبن فليم ,سلايدر ستيشن و برقر بوتيك
تبي برقر محترم ؟ برقر غريب و اكلات لذيذة .. تروحون حق احد المطاعم الي فوق

المهم نبدي بزيارتنا حق برقر بوتيك الي بالرايه بحلته اليديده , يتميز كل اطباقه اورقانيك لحد الكاتشاب

  الابتايزرز الحين

Sweet potatoes

البطاطا الحلوه الي يحبها بتعجبه 

Dynamite fries

لذييييذ جدا فيه جبن و قطع لحم صغيره و هالابينو و صلصه لذيييذه و بصل كراميلايزد

Mushroom pops

مشروم مثل ما انتو شايفين حاشينه بشي لذيذ و معاه صلصه تغمس فيها

البرقرز يحطونهم في بوكسات تونس

اول برقر

طلبنا الخبز whole grain

و نقينا المكونات,بيكون ،جبن،خس،مخلل و rellish

اكيد كانت لذيذه

Mushroom & swiss

Swiss bacon

Houston burger

المطعم مثل ماقلت بالبدايه اقوى برقر و ضروري تجربونه ,عندهم برقرز اكبر و في سلايدرز ,مو بس لحم في دياي و سمج

مليوون شطيره لهم

Uno de 50

في قراند افنيوز عند صعده اي هوب .. تلقون محل

uno de 50

بالزاويه

خل نشوف شنو عندهم

المحل معظم اغراضه اكسسوارات مختلفه من اساور و خواتم و قلوب

هني تلقون انواع الاساور المختلفه

معظم اشيائهم

funky

يعني احسها مادري شقول شبابيه او غريبه

ميداليات ايضا

للأمانه ما عجبتني اشياء وايد .. لكن لما شفت كذا شي لفت انتباهي استغربت من الاسعار

يعني الأساور تقريبا في بسعر ال60

و الشكل كلش ما يعطي

شرحولي الي بالمحل ان سبب هذا ان كل القطع

hand made

و هذا الي يميز محلهم ..

الصراحه ما عجبني وايد و لو ان الشغل يدوي هم ما يعطي سعره

القو نظره و شوفو  

Fauchon

فوشون من احلى المطاعم حق الريوق 

حتى الغدا والعشا و ممكن اذا تبون تحلون بس احنا نحبه بالريوق 

عندهم الاميريكان بريك فاست 

اميريكان بضمير كل شي حاطين فيه 

والطلب الثاني اهو الانقلش بريك فاست 

اختياركم من البيض على حسب الطريقه الي تحبونها ، واجبااان وفواكه على جنب طبعا 

مع الريوق اييبونلكم سلة خبز  ومربى وعسل 

ومن المعروف ان الفرنسيين يحبون الاجبان واهو مطعم فرنسي ، عندهم طلب كامل بس 

اجبان حق عشاق الجبن

وعندهم من المقبلات الي نحبها البري جيز 

عندهم شريمب فوندو حلو وسلطاتهم تونس حلوه 

عندهم عصاير حق الي يحبون الخلطات 

المطعم ككل حلو على الريوق و الجبن 9 شطائر بس 

باجي المنيو نعطيه7 شطائر 

Pintxos..

 اليوم قررنا نجرب شي يديد على العشا 

المطعم الي رحناله اسباني موجود بسطرة سلايدر ستيشن اخر مطعم بالزاويه 

المطعم من برا صخه و ظلام بظلام 

حبيتهم لان فتحولي الحدايد وصفطت السياره عند الباب 

المطعم من داخل وايد ظلاااااام وعشان تشوفون المنيو اييبونلكم ليت صغير ، طبعاً صورناه لكم مع الديكور الي كله اضاءه خافته 

الي يشتغلون حبوبين ويساعدونكم اذا توهقتوا بالطلب 

المميز بالاكل ان عباره عن بايتس ، قطع صغار ونفس ماقالت فاطمه مو متعبين نفسهم كل شي مايحتاج شوكه و سچين 

المقبلات 

Rock shrimps 

تقريباً ماكو احد ما يضبط الربيان، هذا احلى شي كليناه و الصلصه الي معاه حلوه 

Hallomi bites 

حلو بس حجم القطع كبار ماجنه بايتس ، والصلصه كاتبين ان فيها رقي ، الي يحب الجبن راح يحب هالطبق 

Potato frabas 

حيل عادي ، مافيه شي زود .. الصلصه حاره شوي .. موذاك الزود بس بطاط ينوكل حتى لو عادي

Mushroom Coca

حلو حبيناه لان نحب المشروم ، حاطين اكثر من نوع ، والجبنه الي موجوده طعمها سويت ، حبيناه 

عشان نصور لازم نبطل الفلاش ، واذا حقروكم الفلبن اقوئ حركه بطلوا الفلاش حطوه على الطوف وصكوه وردوا بطلوه ايونكم ركض 

الحين طلباتنا اليايه كلها لحوم حيل عاديين ، ماتوقع اذا رحنا نطلبهم مرا ثانيه 

Beef taco

الخبزه مو خبزة تاكو ، كلش موحلوه والصلصه الي حاطينها باللحم بايخه ، المهم احنا ما كملناهم 

Beef tostadas

التوستاداس ثلاث انواع دياي ، لحم ، ربيان احنا كنا نبي دياي بس الحظ عكسنا الويترس قرر يوكلنا لحم ، موحلوه فيها طعم سويت ، كلش ماحبيناها يمكن الانواع الثانيه احلى 

Beef Skewer

ثاني احلى شي كليناه ، البطاط الي معاه تعبانين عليه لو تاكلون اللحم نفس ما اهما حاطينه بالترتيب يطلع الطعم اضبط 

المنيو من كثر ما اهو مليق انا مافكرت اقراه كان كل شي من اختيار فاطمه اهيا تتفاهم مع الفلبيني و انا ايدها الراي 

المنيو فيه سيي فوود يمكن حلو ، احنا ماجازفنه لان مو الكل يضبط السمج ، هذه كانت كل اختياراتنا 

اخر الشي العصير 

Strawberry Passion 

Lemon grass 

الاول طعمه حلاو حامض حلو 

والثاني طعمه طعم حبوب المص 

المهم كنا يواعه وكلينا و الحمدالله على النعمه 

الحياة تجارب لكن مانفكر نردله مرا ثانيه ، اذا رحتوله قولولنا عن الاطباق الي جربتوها

التقييم عباره عن 6 شطيرات